ဧရာဝတီတိုင်းဒေသကြီး ဖျာပုံမြို့နယ်၊ အမာမြို့၊ ဘဝသစ်ကျေးရွာအုပ်စု ထွန်းအောင်ချောင်းပိုက်တန်း ရေလုပ်သားအစုအဖွဲ့နဲ့ ပိုက်ထောင်နေသူ နှစ်ဦး မိုးကြိုးပစ်ခံရတာကြောင့် တဦးသေဆုံးပြီး တဦး ပျောက်ဆုံးနေတယ်လို့ သိရပါတယ်။
မေလ ၂၃ ရက်နေ့ ညနေ ၃ နာရီခွဲလောက်က ထွန်းအောင်ချောင်းပိုက်တန်းမှ ကိုဇော်မျိုးနဲ့ ကိုလှဌေးနိုင်တို့ နှစ်ဦး ပိုက်ဖော်ပိုက်သိမ်းဖို့ ပိုက်တန်းကို စက်လှေနဲ့ သွားခဲ့ကြပြီးနောက် မိုးကြိုးပစ်သံတွေ လျှပ်စီးတွေ တွေ့ရပြီး ပိုက်ဖော်သွားတဲ့ စက်လှေပြန်မလာတာကြောင့် ကိုလှဌေးနိုင်ရဲ့ ဖခင်က မြစ်ဝပိုက်တန်းကို လိုက်ရှာခဲ့တယ်လို့ ဒေသခံတွေက ပြောပါတယ်။
ရေစီးအတွင်းမျောပါနေတဲ့ စက်လှေပေါ်မှာ ကိုဇော်မျိုး ကို ပက်လက်အနေအထား သေဆုံးနေတာကို့ တွေ့ရှိပြီး ကိုလှဌေးနိုင်ကို ရှာဖွေရာမတွေ့ခဲ့ဘူးလို့ ဆိုပါတယ်။
လှေဦးပိုင်းမှာ မိုးကြိုးပစ်ခံထားရတဲ့ သစ်သားအကွဲစတွေ တွေ့ရှိရပြီး သေဆုံးသူ ကိုဇော်မျိုးကို အမာပြည်သူ့ဆေးရုံကို ပို့ဆောင်ခဲ့ပြီး ပျောက်ဆုံး ကိုလှဌေးနိုင်ကို ရေလုပ်သားတွေနဲ့ တာဝန်ရှိသူတွေက စုပေါင်းရှာဖွေနေကြတယ်လို့ သိရပါတယ်။
ကျော်စိုးမိုး